CERMI Galicia elixe a Luciano Fernández como novo presidente
CERMI Galicia (Comité de Entidades Representantes de Persoas con Discapacidade) e EAPN Galicia (Rede Galega de Loita contra a Pobreza), redes das que a Federación Down Galicia forma parte, participaron o pasado 17 de novembro na Comisión non permanente especial de estudo sobre a reactivación económica, social e cultural de Galicia pola crise da COVID-19, organizada polo Parlamento de Galicia.
O CERMI propón oito medidas prioritarias
Durante a súa comparecencia, Iker Sertucha, presidente do CERMI Galicia, quixo reflectir as necesidades existentes que se deben ter en conta de cara á normalización e restablecemento dos servizos de atención ás persoas con discapacidade e as súas familias e deixar atrás un período de confinamento que afecta ao colectivo dende o mes de marzo, por mor da pandemia da COVID-19.
Sertucha expuxo oito medidas prioritarias para o futuro dos colectivos que forman parte do CERMI, entre as que destacan a posibilidade de contar cun fondo de reserva económico destinado ás entidades da discapacidade en Galicia para afrontar os custos económicos derivados da pandemia; adaptar e fomentar a información e a comunicación accesible para todas as discapacidades, así como intentar evitar que se dean situacións de fenda dixital; dar prioridade ás políticas sociais, educativas e de saúde nos orzamentos autonómicos do 2021 para o ámbito da discapacidade; ou fomentar que as empresas teñan en conta as particularidades da discapacidade no traballo a distancia; entre outras.
Pincha aquí para ver a intervención completa do presidente do CERMI Galicia
Emerxencia residencial, a principal demanda de EAPN
A presidenta de EAPN Galicia, Eloína Ingerto, comezou a súa intervención lembrando como a COVID-19 trouxo un agravamento notable da situación daquelas persoas máis afectadas e que apenas se beneficiaran da recuperación económica, en especial mulleres, mozas e mozos e nenas e nenos.
No seu discurso tamén se referiu á necesidade de loitar contra as causas da pobreza e a desigualdade dende un enfoque de dereitos, o que esixe fuxir do asistencialismo e asegurar non só a satisfacción incondicional das necesidades básicas senón tamén o dereito, non a obriga, a unha inclusión social activa.
Dentro das demandas abordadas pola EAPN, destacan a vivenda como obra pública e o emprego digno para erradicar a pobreza e a exclusión social. Ingerto quixo poñer de manifesto a situación de emerxencia residencial na que viven milleiros de familias galegas, recomendando a creación dunha Comisión parlamentaria sobre vivenda e exclusión residencial e a posta en marcha de medidas específicas como a erradicación do chabolismo e a infravivenda ou a promoción da rehabilitación e o alugueiro social.
No referente ao emprego, a presidenta da Rede apuntou a unha das demandas das persoas en pobreza ou exclusión social: “menos cursos e mais emprego“ e sinalou que o dereito á inclusión sociolaboral implica un acompañamento estable, personalizado e coordinado entre Servizos Sociais e Emprego.
Por último, entre outras cuestións, desde a EAPN Galicia tamén se lembrou o compromiso do Pleno de Investidura en blindar o orzamento da Renda de Inclusión Social de Galicia (RISGA), asegurando a súa compatibilidade e subsidiariedade co Ingreso Mínimo Vital (IMV).
Pincha aquí para ver a intervención completa da presidenta de EAPN Galicia
Entradas relacionadas
