Down España celebra o vindeiro xoves 3 de decembro de 17:30 h a 20:30h (hora peninsular de España) ‘Experiencias e prácticas inclusivas’, unha cita na que os mellores profesionais en pedagoxía e ensino inclusiva participarán explicando as súas experiencias e as prácticas máis recomendables para favorecer este modelo educativo. O obxectivo é reflectir que a práctica inclusiva é posible se se opta realmente por “crear inclusión”.

A xornada, dirixida tanto a profesionais da educación, como a familias de persoas coa síndrome de Down, será en liña, gratuíta e accesible desde calquera punto, xa que se realizará vía Zoom. Durante a sesión, tentarase aclarar as dúbidas que poida espertar a educación inclusiva e compartir experiencias que poidan servir de exemplo. Para iso, o presidente de Down España, Mateo San Segundo, iniciará a xornada analizando a situación da educación inclusiva en España e porque é necesaria unha transformación da escola no noso país cara a un modelo moito máis participativo e inclusivo para o alumnado con discapacidade intelectual.

Pola súa banda, o pedagogo Antonio Márquez e a asesora de educación inclusiva de Down España, Ana Belén Rodríguez, explicarán experiencias reais en diferentes colexios inclusivos. Ademais, indicarán como debe ser a docencia compartida e o apoio educativo dentro da aula.

Despois, as persoas asistentes a esta xornada virtual, poderán coñecer as experiencias como orientador e como docente de Juan Fontanillas e de José Manuel González. Estes expertos centraranse en explicar en qué consiste o ensino multinivel e o Deseño Universal de Aprendizaxe na aula e o papel do orientador ou orientadora na educación inclusiva.

Para finalizar, e tendo en conta as circunstancias tan complexas que vivimos hoxe en día debido á pandemia, a directora do centro Príncipe Felipe, Mª Carmen Medina, detallará como debe ser ese proceso de transformación cara á educación inclusiva en tempos de COVID.19. Ademais, a familia González compartirá con todas as persoas asistentes a súa experiencia e a importancia do papel das familias en relación ao proceso mencionado.

Ao termo de cada un dos paneis desta xornada, realizada en colaboración co Ministerio de Sanidade, Servizos Sociais e Igualdade, haberá un momento dedicado aos rogos e preguntas.

Enlace de acceso á xornada: https://us02web.zoom.us/j/85024815559