Cunha achega de 9.600 euros, o Instituto Galego de Promoción Económica (IGAPE), axencia adscrita á Vicepresidencia Segunda e Consellería de Economía, Empresa e Innovación para o desenvolvemento económico de Galicia, colaborou neste 2020 co proxecto “Banco de recursos para superar a brecha dixital de persoas coa síndrome de Down e/ou discapacidade intelectual” de Down Galicia.
Debido á situación que está a atravesar o noso país a raíz da pandemia orixinada pola COVID-19, a Federación Down Galicia puxo en marcha unha serie de medidas de carácter extraordinario, que garanten que os programas e as actuacións que se estaban executando antes da crise sanitaria poidan seguir desenvolvéndose nas mellores condicións posibles, tanto para as persoas destinatarias das mesmas, como para os e as profesionais que as levan a cabo.
Ante esta nova realidade, as entidades Down precisan dispoñer dun equipamento tecnolóxico que asegure que todas as persoas usuarias poidan seguir beneficiándose das actividades organizadas, e tamén que o equipo de profesionais poida desenvolver o seu traballo mantendo a eficacia e a eficiencia da intervención e atención ás persoas coa síndrome de Down e/ou discapacidade intelectual e as súas familias.
Aínda que é certo que as entidades de Down Galicia melloraron substancialmente o seu equipamento tecnolóxico nos últimos anos, a realidade coa que nos atopamos a raíz da pandemia é que existe unha parte das nosas persoas usuarias e familias que non dispoñen nos seus domicilios do equipamento informático necesario para poder seguir beneficiándose dos servizos prestados.
Deste xeito, e grazas á achega do IGAPE, a Federación puido adquirir material informático que permite levar a cabo unha atención telemática e a distancia de calidade ás persoas usuarias das entidades Down. En concreto, Down Galicia fíxose con 17 tabletas, 11 portátiles e 5 altofalantes, creando un banco de recursos para o seu préstamo temporal a aquelas familias que se atopan nunha situación de fenda dixital.
Esta achega enmárcase dentro das axudas a proxectos de dixitalización da Xunta de Galicia para facer fronte á situación provocada pola COVID-19, susceptibles de cofinanciamento polo Fondo Europeo de Desenvolvemento Rexional, no marco do Programa Operativo FEDER Galicia 2014-2020.