“Vivir sen violencia,
dende Teima queremos mellorar a conciencia.
Máis liberdade,
saber amar a diferenza.
Saír á rúa sen medo,
por ser muller non queremos telo.
Expresar as nosas capacidades,
iguais ou diferentes, non son menos.
Xa é hora de parar.
Desde Teima queremos respecto e igualdade,
para voar coas mesmas oportunidades”
Con este estupendo poema, un grupo de mozos e mozas de Teima Down Ferrol participaron o pasado mes de novembro no Desafío Poético proposto pola Deputación da Coruña, unha iniciativa que busca facer da rima e das redes unha reivindicación contra a violencia machista.
O desafío, dividido en tres categorías diferenciadas por idade,consistiu en compartir en Facebook ou Twitter unha publicación onde se vise, recitase, cantase ou amosase un texto poético de creación propia (ou elección).
Tralo proceso de votacións en redes sociais, o grupo de teimudos e teimudas logrou alzarse coa vitoria na categoría #DesafíoXuvenil (de 13 a 19 anos), conseguindo o correspondente premio, consistente nun bono de 60€ para gastar nunha libraría da provincia da Coruña.
O Desafío Poético é unha actividade enmarcada na campaña “DE FRONTE á violencia de xénero”, desenvolvida pola Área de Igualdade da Sección de Servizos Sociais da Deputación da Coruña.