Conscientes da crise sanitaria actual, as persoas usuarias do programa de emprego de Down Coruña quixeron reflexionar sobre a importancia de manter os seus postos de traballo, así como de non perder a esperanza de que as súas oportunidades chegarán, no caso daquelas que están en proceso de procura de emprego.
Durante a súa conversación, Miguel Taibo, usuario da entidade, quixo compartir os seus recordos e a súa experiencia desde os seus inicios laborais. Pasaron nin máis nin menos que 11 anos desde que empezou a traballar en Alcampo.
Lembra os seus inicios con ilusión, destacando que era a súa “primeira experiencia laboral e quería crear boa sensación”.
“Lembro o apoio do preparador laboral, que ao principio estaba moito tempo comigo ensinándome, e que a miña coordinadora Ana dicíame “Ti e eu farémonos vellos aquí”, e aquí seguimos…”, comentaba Miguel.
Ante a pregunta de en que cría que tiña cambiado ao longo destes 11 anos, Miguel non dubida en destacar que nunca se imaxinou estar a traballar cos seus compañeiros e compañeiras tanto tempo e destaca que ao principio era máis calado e agora relaciónase máis con todos e todas elas.
Sinala que segue sendo moi feliz no seu traballo. “Noto que madurei, estou pendente de cobrar a fin de mes e xestiono o meu diñeiro. Cos cartos que gaño, entre outras cousas, pago a cota do Deportivo da miña nai e a miña, fago agasallos á miña familia e convido os meus amigos e amigas a tomar algo”.
“Estou moi orgulloso do que conseguín. Ter síndrome de Down non me impediu conseguir as miñas metas”.