Down España inaugurou o pasado venres a primeira Xornada de Coordinación Nacional do Proxecto Campus Oportunidades para a Inclusión, no que participa Down Vigo por segundo ano consecutivo. O proxecto baséase no desenvolvemento de accións formativas para que as persoas coa síndrome de Down e outras discapacidades intelectuais adquiran ou completen as súas competencias a través da colaboración con estudantes universitarios.

Na edición deste ano, xunto a Down Vigo colaboran as entidades de Badaxoz, Huesca, Granada e Lleida, ademais do Ministerio de Educación e Formación Profesional. O eixo central desta edición será a creatividade literaria entre os mozos e mozas. No caso de Down Vigo, a asociación seguirá apostando polas accións formativas inclusivas no ámbito universitario, que actualmente se están desenvolvendo grazas ao programa ALIDA, cunha segunda promoción, e ao Curso de Especialización, enfocado ao sector empresarial.

Así, a entidade achegará o seu punto de vista baseado na experiencia de implicar ao colectivo universitario nunha formación inclusiva, dándolles a oportunidade de convivir, relacionarse en diversidade e desenvolver competencias eficaces vinculadas á inclusión escolar e social do alumnado coa síndrome de Down e discapacidade intelectual. A vinculación dos e das estudantes coa proposta pedagóxica establecerase, preferentemente, a través de metodoloxías de aprendizaxe-servizo.

As accións do Campus Oportunidades para a Inclusión levaranse a cabo en tres tipos de contextos inclusivos: educativos (facultades universitarias, centros de educación de persoas adultas, centros de formación profesional, etc.), culturais (asociacións culturais, centros culturais, museos, etc.) e sociais (asociacións de persoas con discapacidade, asociacións de veciños e veciñas, centros de desenvolvemento social, etc.).