A Deputación de Lugo e o CB Breogán colaboran na visibilización do labor de Down Lugo
Que non se pode? Pois búscase unha alternativa!
Iso foi o que pensaron as persoas usuarias de Down Lugo, que non quixeron que as restricións sanitarias derivadas da pandemia da COVID-19 as limitase á hora de gozar do seu tempo libre. Por iso, ante a imposibilidade de realizar saídas de lecer na contorna comunitaria da súa cidade, a asociación decidiu adaptarse e reinventar as súas sesións de ocio co obxectivo de que o día a día das súas persoas usuarias siga a desenvolverse coa maior normalidade posible.
Así é como decidiron que as quedadas de lecer que adoitaban realizar cada semana, pasasen a ser en formato en liña desde o mes de xaneiro. Os mozos e mozas de Down Lugo non estaban dispostos a renunciar ao seu tempo compartido e planearon varias actividades lúdicas para seguir gozando xuntos de momentos amenos e divertidos: karaoke, concursos, xincanas, visualización de curtametraxes e un longo etcétera.
As quedadas realizadas ata o momento foron todo un éxito, tanto en número de persoas participantes como no interese amosado, polo que Down Lugo decidiu amplialas a dous sábados ao mes.
Entradas relacionadas
