Down España impulsa un novo proxecto centrado en acompañar ás familias nos primeiros momentos, desde o nacemento do seu bebé con síndrome de Down ou mesmo desde o diagnóstico. Para iso, os expertos e expertas da Rede Nacional de Atención Temperá elaboraron unha publicación que recolle a súa experiencia no proceso de acompañar ás familias e conectalas con outras que pasaron por situacións similares.

O programa diríxese principalmente aos equipos profesionais e ao conxunto de familias das entidades federadas que van constituír equipos de Familias Escucha, pero tamén a profesionais do ámbito sanitario ou de servizos sociais que estarán implicados en ofrecer o programa ás novas familias.

Este programa é unha das propostas do protocolo de comunicación de primeira noticia de Down España. Consiste nun conxunto de actuacións para acoller ás novas familias no momento de aceptación inicial do diagnóstico de síndrome de Down, desde a igualdade, facilitándolles o contacto con outras familias que pasaron por unha experiencia parecida, de modo que poidan ofrecerlles comprensión e modelos de afrontamento positivo.

A federación nacional considera que, para que este encontro entre familias poida desenvolverse con garantías, tanto para a familia acollida como para a que acolle, as entidades deben planificar algunhas accións como a difusión e  coordinación con servizos sociosanitarios que garantan o acceso ao programa daquelas familias que o desexen, e a creación dun equipo de Familias Escucha nas entidades cunha preparación específica para afrontar con éxito unha tarefa que mobiliza tantas emocións en ambas familias.

A publicación Familias Escucha, elaborada coa colaboración do Ministerio Sanidade, Consumo e Benestar Social, atópase dispoñible picando aquí.