Con motivo do Día Mundial da Síndrome de Down, que se celebra en todo o mundo o 21 de marzo, Renfe e a Federación Down Galicia colaboran novamente co obxectivo de dar visibilidade ás persoas con síndrome de Down e outras discapacidades intelectuais.

Por este motivo, a operadora colocou máis de 2.000 repousacabezas da campaña “Tan diferentes como iguais”, que a federación leva a cabo con motivo desta conmemoración, nos trens de Servizo Público de Galicia que circularán polo Corredor Atlántico durante este mes de marzo.

Con esta campaña Down Galicia pretende poñer en valor o concepto da diferenza e dar visibilidade á idea de que ningunha persoa é igual a outra e que, precisamente, esa diferenza é a que nos enriquece como sociedade.

Nacións Unidas aprobou en novembro de 2011 a declaración desta data, o 21 de marzo [21/03], como un símbolo en referencia á  triplicación [trisomía] do cromosoma 21 que se traduce na condición xenética da síndrome de Down.