A Xunta de Galicia vén de publicar no Diario Oficial de Galicia a Orde pola que se regula a oferta de prazas xuvenís dentro do programa Campaña de verán 2021.
A Consellería de Política Social, a través da Dirección Xeral de Xuventude, Participación e Voluntariado, pon en marcha esta iniciativa para favorecer a participación da xuventude galega en actividades do ámbito do lecer e o tempo libre.
Poden solicitar a súa participación nas actividades ofertadas nesta convocatoria as persoas mozas residentes en Galicia de entre 9 e 17 anos.
As persoas que teñan unha discapacidade igual ou superior ao 33% poderán participar nesta convocatoria cumprindo os seguintes requisitos:
- Facer constar a súa condición na epígrafe que figura no seu impreso de solicitude, co fin de planificar os apoios persoais necesarios, se os precisar.
- Que no certificado de recoñecemento de discapacidade non se recolla a necesidade de axuda de terceira persoa.
- Ter capacidade de integración nun grupo e que as súas limitacións e/ou necesidades especiais lles permitan participar e beneficiarse das actividades que se van desenvolver no destino que soliciten.
As persoas solicitantes con discapacidade que cumpran os requisitos sinalados anteriormente deben optar polo procedemento xeral ou polo procedemento das prazas reservadas para inclusión, de xeito que quedarán excluídas no suposto de que presenten a solicitude por ambos os procedementos.
Dende as entidades Down, no marco da defensa da inclusión promovemos a participación das persoas usuarias das nosas entidades nas actividades ordinarios que ofrece a súa contorna.
O prazo de presentación de solicitudes remata o venres 28 de maio e estas deberán ser presentadas preferentemente por vía electrónica a través da sede electrónica da Xunta de Galicia.
Toda a información sobre a convocatoria desta campaña, a programación de actividades e as características das instalacións de cada campamento está dispoñible na páxina web http://xuventude.xunta.es/accion-de-veran
