Down Coruña inaugura “El Quiosco de Down Experience” na Praza de Ourense da cidade herculina
O vindeiro domingo terán lugar no IES Antonio Fraguas de Santiago de Compostela e na Escola Oficial de Idiomas de Ponferrada as probas para a obtención dos certificados Celga 2 de lingua galega. Estas certificacións, dependentes da Secretaría Xeral de Política Lingüística da Xunta de Galicia, permiten acreditar o coñecemento que unha persoa ten do galego a efectos de xustificar méritos ou requisitos laborais e académicos.
Nos últimos anos foron moitas as persoas vinculadas ás entidades Down as que se presentaron a estas probas, conseguindo moitas delas superar o proceso tras dedicarlle moito esforzo e dedicación.
Un bo exemplo son Verónica Pardellas e Joan Abuín, dous mozos coa síndrome de Down de Ourense e Lugo, que conseguiron superar a proba completa o pasado ano tras dedicarlle dúas horas diarias á súa preparación. Ambos coinciden en que o exame non lles resultou moi complicado e Verónica xa está pensando en “sacar un Celga superior”.
Tamén Xoel Pardo, usuario de Down Coruña, quixo presentarse porque quere “conseguir un traballo na Administración Pública e ter o Celga 2 era un dos requisitos”. Aínda que recoñece que lle custa un pouco falar en galego, non tivo problemas para superar a proba, xa que “estudaba media hora diaria e tamén practicaba con chamadas telefónicas coas preparadoras cando estaba preto a data de exame”.
Con todo, hai quen, a pesar de esforzarse moito, non supera o proceso, pero continúa preparándose para facelo nun futuro. É o caso de Andrea Iglesias, unha moza con discapacidade intelectual de Ourense que non conseguiu o certificado, pero que volverá a intentalo máis adiante, cando poida “preparalo en clases presenciais, para poder levalo mellor”.
Todos e todas elas queren animar a outras persoas coa síndrome de Down e outras discapacidades intelectuais a presentarse en vindeiras edicións, xa que é “unha boa experiencia que axuda a encontrar traballo”.
Necesidade de cursos preparatorios en lectura fácil
Unha boa formación é vital para a consecución duns bos resultados en calquera proba de certificación e, como vén sendo habitual desde os seus inicios, a Federación aposta pola preparación a través de recursos comunitarios da contorna.
Nos últimos anos conseguíronse grandes avances en relación ás probas para a obtención dos Certificados de Lingua Galega, como a posible exención nalgunha das partes dos exames ou as adaptacións de tempos e de materiais para facilitar a comprensión e a realización das probas a aquelas persoas con discapacidade intelectual que o precisen, pero desde a Federación Down Galicia continuamos detectando certas carencias no relativo ás formacións.
Ademais da necesidade dunha oferta formativa de ámbito autonómico, presencial e gratuíta para a preparación das probas Celga, desde a Federación consideramos moi necesaria, e máis no momento actual, a existencia dunha formación online en lectura fácil e a accesibilidade á plataforma virtual e aos contidos existentes en base ao deseño universal da aprendizaxe.
O feito de contar con formacións telemáticas máis accesibles e en lectura fácil non soamente beneficiaría ás persoas coa síndrome de Down e outras discapacidades intelectuais, senón que axudaría a diversos grupos, entre os que se atopan as persoas con dificultades na linguaxe, o colectivo migrante ou persoas con baixa formación cultural.
Down Galicia xa trasladou esta demanda á Secretaría Xeral de Política Lingüística nunha reunión mantida o pasado mes de abril, na que a administración autonómica comprometeuse a abordar este tema canto antes.
Entradas relacionadas
