Down Pontevedra Xuntos pecha o ano coa contratación de catro das súas persoas usuarias
Desde hai xa varios anos, son moitas as empresas da cidade de Pontevedra e da súa comarca que confían no programa de Emprego con Apoio de Down Pontevedra “Xuntos”.
Un claro exemplo é Vegalsa-Eroski, que desde hai xa 10 anos conta no seu equipo de traballo con Enma Abal, repoñedora no Eroski de Cambados, e con Manuel García, repoñedor no Eroski de Redondela. Ambos acadaron o seu contrato despois dun período de prácticas e baixo a metodoloxía de emprego con apoio que promove á entidade.
Este mes de maio, outras tres persoas candidatas da bolsa de emprego de Xuntos teñen a oportunidade de realizar prácticas no posto de reposición desta empresa en distintas localidades: Carmen García en Pontevedra cidade, Verónica Rosales en Marín e Manuel Salgueiro en Vilalonga.
O programa de Emprego con Apoio
Desde o ano 2002, as entidades Down en Galicia desenvolven o servizo de Emprego con Apoio, deseñado para atender especificamente as necesidades e barreiras que as persoas coa síndrome de Down e outras discapacidades intelectuais atopan á hora de intentar acceder ao mercado laboral ordinario.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un posto, contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos seus compañeiros e compañeiras de traballo e na mediación na relación con eles para que se desenvolva de xeito positivo e natural.
O acceso en igualdade de condicións a un posto de traballo segue a ser un dos grandes retos das entidades que traballan a prol da inclusión laboral das persoas con discapacidade. A participación e a cada vez maior presenza das persoas con discapacidade intelectual nas empresas ordinarias contribúe de xeito eficaz a desterrar os tópicos que tradicionalmente se atribúen a este colectivo, resultando un xeito sumamente eficaz de inclusión social.
Entradas relacionadas
