O Concello de Agolada contrata de novo a Luis Cristóbal
Como cada ano, desde que en 2014 asinou o seu primeiro contrato de traballo, Luís Cristóbal, usuario de Down Lugo, uniuse de novo ao equipo profesional do Concello de Agolada. Desde o pasado 1 de maio e durante 3 meses, realizará diferentes tarefas auxiliares nas instalacións da administración local.
Esta contratación queda englobada dentro do convenio de colaboración asinado polo concello e a entidade Down e que ten por obxecto facilitar o proceso de inserción sociolaboral das persoas con discapacidade do servizo de Emprego con Apoio de Down Lugo.
Desde a asociación queren agradecer ao Concello de Agolada o interese mostrado durante todos estes anos por contribuír á inclusión social e laboral das persoas con síndrome de Down e outras discapacidades intelectuais, entendendo que as administracións deben ser as primeiras en dar exemplo ao resto do tecido empresarial.
Rocío realiza prácticas laborais de limpeza na empresa Termavi
Pola súa banda, Down Vigo asinou un convenio de colaboración coa empresa Termavi (Terminais Marítimas de Vigo), pertencente ao grupo Davila, co obxectivo de mellorar a empregabilidade das persoas con síndrome de Down e outras discapacidades intelectuais. Desta forma, Rocío, usuaria da entidade, realizará prácticas laborais durante un mes no perfil profesional de limpeza.
Rocío explica que as súas tarefas consisten en “limpar as oficinas e despachos”, así como o resto das instalacións. Trátase dun posto de traballo fundamental, sobre todo no momento actual, xa que a hixiene é unha das principais medidas preventivas para frear os contaxios por COVID-19 na contorna laboral.
Desde Down Vigo queren agradecer esta colaboración, que permite actualizar as capacitacións profesionais das persoas que asisten ao servizo de Emprego con Apoio da entidade.
