A asociación Down Coruña inaugurou esta mañá “El Quiosco de Down  Experience”, un ilusionante proxecto cuxo obxectivo é a inclusión laboral das persoas coa síndrome de Down e outras discapacidades intelectuais.

Á inauguración do novo establecemento, situado na Praza de Ourense da cidade herculina, asistiron a alcaldesa da cidade, Inés Rey, acompañada da concelleira de  Benestar Social, Yoya Neira, e o presidente de Down Coruña, Ricardo Santos.

Inés Rey quixo destacar que “é un orgullo darlle o pistoletazo de saída a este proxecto que me presentaron en campaña durante unha visita á sede de Down Coruña e que me comprometín a levar a cabo; hoxe é unha realidade”.

Pola súa banda, o presidente de Down Coruña, Ricardo Santos, sinalou que o proxecto é unha aposta clara pola inclusión laboral do colectivo, que pretende visibilizar que as persoas coa síndrome de Down e outras discapacidades intelectuais son capaces de promover unha iniciativa empresarial deste estilo.

Neste espazo traballarán 16 persoas, 12 delas con discapacidade, que prepararán unha versión renovada e con estilo propio do clásico bocadillo de luras. Pero a especialidade deste negocio serán os cafés, contando con variedades chegadas de países como Etiopía, México e Costa Rica.

Esta fin de semana o equipo de El Quiosco atenderá unicamente a persoas socias de Down Coruña, mentres que a apertura ao público xeral terá lugar o luns 21 de xuño. A atención ao público será de luns a sábado en horario ininterrompido de 8:00 a 22:00 horas.