Down Galicia participa no seminario sobre o novo réxime xurídico da discapacidade organizado pola USC
Down Galicia organizou esta tarde unha charla virtual dirixida ás persoas usuarias e familias pertencentes ás entidades membro da Federación, centrada na reforma lexislativa que modifica a capacidade de obrar das persoas con discapacidade.
A principios deste mes, publicábase no Boletín Oficial do Estado a “Lei 8/2021, do 2 de xuño, pola que se reforma a lexislación civil e procesual para o apoio ás persoas con discapacidade no exercicio da súa capacidade xurídica”, unha reforma moi esperada que remata coas incapacitacións xudiciais das persoas con discapacidade.
As persoas encargadas de trasladarlle ás familias e persoas usuarias as principais novidades desta reforma legal en materia civil e procesual foron Maripaz García Rubio, Catedrática de Dereito Civil da USC e membro da Sección Primeira da Comisión de Codificación encargada da elaboración do borrador do proxecto de lei, e Imaculada Espiñeira, notaria en Santiago de Compostela.
Ambas contestaron todas as preguntas e dúbidas existentes tras explicar de xeito sinxelo e comprensible o alcance desta reforma, o significado real do novo sistema proposto ou a situación na que quedarán as persoas con discapacidade que están incapacitadas xudicialmente neste momento.
Entre as principais novidades do texto destacan, sobre todo, a desaparición de figuras como a tutela ou a patria potestade prorrogada e a proposta, no seu lugar, dun sistema de apoios individualizados e adaptados ás necesidades de cada persoa para que poidan tomar as súas propias decisións libremente e con toda a información posible.
Entradas relacionadas
