Xuntos continúa coa súa aposta polo deporte inclusivo coa sinatura de tres convenios de colaboración
Down Vigo participa na iniciativa Camiño Verde, na que entidades sociais de toda Galicia percorren tramos do Camiño de Santiago co obxectivo de fomentar a inclusión social e a sustentabilidade ambiental. Así, cada martes e xoves, diversas entidades de toda Galicia irán completando etapas de maneira cooperativa, achegando ademais un enfoque ambiental a través da recollida de residuos e a concienciación co coidado da natureza.
A iniciativa, na que participan máis de 60 persoas con diversidade coa síndrome de Down e outras discapacidades intelectuais xunto a profesionais de apoio das entidades e voluntariado, comezou o pasado martes 1 de xullo, cando 10 participantes de Down Vigo percorreron, xunto a profesionais da entidade, parte do camiño portugués pola costa entre os municipios de A Guarda e Oia. Durante o traxecto, as persoas participantes contribuíron ao coidado do medio ambiente realizando unha recollida de residuos, que posteriormente foron depositados nun punto limpo.
Está previsto que todos os martes e xoves do mes de xullo diferentes grupos de entidades que traballan con persoas con diversidade intelectual da provincia de Pontevedra realicen algunha das oito etapas que compoñen o tramo galego do camiño portugués pola costa. A etapa final será o día 29 de xullo entre Padrón e Santiago de Compostela.
As entidades que participarán nalgunha das oito etapas serán HC San Rafael, EVD Galicia, Down Vigo, Centro Juan María, ACEESCA, Fundación Amedis, San Xerome, Aspanaex e Discamino.
Inclusión social e concienciación mediambiental
Este proxecto ten dous obxectivos fundamentais. En primeiro lugar, busca “mellorar a calidade de vida de persoas con discapacidade intelectual e favorecer a súa inclusión social a través da práctica deportiva, o contacto con outros colectivos e o coidado do medioambiente”, como explica Teresa Martínez, presidenta de ASDEGAL.
En segundo lugar, Camiño Verde ten como propósito “reducir a pegada de carbono do Camiño de Santiago e potenciar o coñecemento do patrimonio, a cultura e as contornas naturais dos municipios polos que pasa este roteiro”, en palabras de Diego Maraña, CEO de Qualitynova Consultores.
Desde Down Vigo agradecen aos organizadores que contasen coa súa entidade para sumar quilómetros en favor da inclusión social e a concienciación ambiental.
Entradas relacionadas
