Aínda que non o pareza polo tempo cambiante das últimas semanas, o verán xa está aquí e Down Lugo quere aproveitar estas datas para desfrutar de distintas actividades de ocio.
Despois de moito tempo, os mozos e mozas da entidade puideron volver a realizar unha das súas habituais excursións, aínda que neste caso dividida en tres, xa que, para respectar as medidas sanitarias, estas saídas foron organizadas tendo en conta os grupos de convivencia establecidos durante todo o ano. Cada un deles escolleu previamente o destino e os plans quedaron da seguinte maneira:
O primeiro grupo decidiu achegarse ata a cidade da Coruña. Tras unha visita guiada ao Castelo de San Antón, pasearon polo porto da cidade e gozaron do Aquarium Finistearrae.
O segundo grupo tamén escolleu A Coruña para a súa visita, pero repartiu o día cunha mañá de praia no areal de Oza, onde aproveitaron para bañarse, tomar o sol e comer, e unha tarde de turismo pola cidade, onde visitaron a Torre de Hércules e os seus arredores.
O último grupo pensou nun plan máis relaxado e decidiron ir a pasar o día á praia de Cabanas, en Pontedeume, onde pasaron unha marabillosa xornada entre risas, xogos e baños.
Taller de batucada da man de Tambukda Lugo
Ao longo deste ano, Down Lugo levou a cabo un taller de música no que se buscou fomentar o uso da música como canle de comunicación e no que as persoas participantes puideron gozar de actividades nas que coñecer diferentes sons, instrumentos e estruturas musicais, bailes e xogos rítmicos para expresarse dunha forma diferente.
A monitora do taller, Ana, forma parte do grupo de percusión Tambukda Lugo e, por esa razón, xurdiu a idea de que o taller de música deste ano tivese un peche moi especial. Así, hai unhas semanas, os mozos e mozas da asociación gozaron dunha animada actuación de percusión nos arredores da entidade, bailando e divertíndose ao ritmo dos tambores.
