Down Galicia estrea un vídeo explicativo sobre a nova reforma lexislativa en materia de discapacidade
A compañía galega de distribución alimentaria Vegalsa-Eroski, xunto co seu socio Grupo Eroski, dedica o programa Céntimos Solidarios dos seus supermercados durante o mes de agosto ao proxecto “Unha escola para tod@s” de Down Galicia, xunto a outros dous programas de COGAMI e FAXPG. A empresa busca recadar fondos para contribuír á inclusión social de persoas con discapacidade física e orgánica, persoas xordas e persoas coa síndrome de Down e outras discapacidades intelectuais. A campaña, aberta desde o pasado día 29 de xullo, permanece activa ata o 25 de agosto en todos os supermercados e hipermercados Eroski da súa rede comercial.
As persoas con discapacidade teñen máis risco de caer na pobreza debido á falta de oportunidades laborais, dificultades para realizar actividades de calquera tipo, mobilidade limitada ou discriminación, entre outras razóns. A crise da Covid-19 agravou esta situación aínda máis, segundo sinala a firma, polo que Vegalsa-Eroski, Down España, Cocemfe e CNSE impulsaron esta campaña solidaria para tentar aliviar a súa situación, poñer de manifesto as capacidades destes colectivos e contribuír así á súa integración laboral e social.
“As persoas con discapacidade son unha das principais vítimas da pandemia. O illamento contribuíu a empeorar o seu estado de saúde e a incrementar o número de persoas en risco de exclusión social. Por iso, agora máis que nunca, é necesario garantir o seu benestar e axudarlles a que aos poucos recuperen de novo as súas rutinas”, explica a directora de RSE, Comunicación e Área Cliente de Vegalsa-Eroski, Gabriela González.
Por unha educación inclusiva e de calidade
“É de agradecer o xesto de Velgalga-Eroski por esta gran iniciativa. O noso proxecto ‘Unha escola para tod@s’, ao que vai destinado Céntimos solidarios, reivindica a educación inclusiva como a única vía de educar nunha sociedade que mira o futuro. Down Galicia naceu con esa orientación, con ese obxectivo. Non hai educación se non é inclusiva, xa que a chamada educación especial é segregadora, separa aos nenos e nenas da nosa sociedade”, sinala pola súa banda o presidente da Federación Down Galicia, Delmiro Prieto.
Non dubides en deixar a túa achega coa túa compra este agosto!
Entradas relacionadas
