Os “Campionatos Baristas Down” foron unha das catro iniciativas galardoadas cos premios que cada ano outorga a revista La Alacena Roja. Nunha gala celebrada o pasado 13 de setembro no Hotel OCA Puerta del Camino de Santiago de Compostela, a publicación, que este 2021 cumpre o seu oitavo ano de vida, recoñeceu as mellores iniciativas turísticas e gastronómicas do último ano.

Os Campionatos Baristas Down, creados en 2012 pola empresa Cafento e coorganizados pola Fundación Down Compostela, alzáronse co galardón na categoría ‘Del beber’, compartido co establecemento melidense Ribeirao Viñoteca.

Ademais destes recoñecementos, tamén se procedeu á entrega dos premios a ‘Los mejores de 2021’ nas categorías ‘Del comer’, recaendo no restaurante Culler de Pau, e ‘Del viajar’, para o Parador Costa da Morte.

A partir dunha lista de candidatos nomeados polo equipo editor da revista, en función da traxectoria e méritos dos mesmos, un xurado mixto foi o encargado de elixir os mellores en cada categoría. Por unha banda, un xurado profesional composto por 12 expertos en diferentes áreas e, por outro, un xurado popular composto polos seguidores e seguidoras de La Alacena Roja, que votaron durante a última semana a través da páxina web www.laalacenaroja.com.

Sobre os Campionatos Baristas Down

Os Campionatos Baristas Down, creados pola empresa cafeteira Cafento, son unha iniciativa pioneira no mundo que consiste en levar as competicións entre profesionais expertos na cultura do café de calidade ás persoas coa síndrome de Down.

O primeiro Campionato Barista Down desenvolveuse en Galicia no ano 2012, co obxectivo de visibilizar o traballo das persoas coa síndrome de Down e as súas posibilidades de integrarse no mercado laboral como baristas. A partir deste intre, celebráronse ao longo da xeografía española diversos Campionatos Baristas Down, entre os destacan os de Asturias, Andalucía, Comunidade Valenciana e Rexión de Murcia.

Grazas a estes certames, máis dun centenar de persoas coa síndrome de Down e outras discapacidades intelectuais de toda España puideron formarse como especialistas no mundo do café. Delas, case unha trintena tivo ocasión de realizar prácticas laborais en diversos tipos de establecementos de hostalería.

Pero máis aló de pretender contribuír á inserción laboral, e consecuente autonomía das persoas coa síndrome de Down e outras discapacidades intelectuais, os Campionatos Baristas Down queren ser unha oportunidade para visibilizar a este colectivo como persoas perfectamente capaces.