Trala boa experiencia percorrendo a primeira etapa do Camiño Inglés entre Ferrol e Neda, a Federación Down Galicia organizou este sábado unha nova andaina entre as localidades de Mos e Redondela, na que 39 persoas vencelladas á entidade local Down Vigo compartiron unha estupenda xornada co obxectivo de intercambiar experiencias en torno á beleza do Camiño de Santiago.

Esta etapa do Camiño Portugués, conducida por dous guías expertos no Camiño de Santiago e adaptada a unha linguaxe máis sinxela para facilitar a comprensión das persoas participantes coa síndrome de Down e outras discapacidades intelectuais, ofreceu información sobre patrimonio, localidades, riqueza paisaxística, flora e fauna, entre outras.

Trala saída en autobús desde a Escola Oficial de Idiomas de Vigo, onde tivo lugar un pequeno acto institucional no que participou a Delegada Territorial da Xunta en Vigo, Marta Fernández-Tapias, as persoas participantes chegaron ao punto de inicio da ruta, en Santiaguiño de Anta. Alí, puideron desfrutar da marabillosa historia da Capela do Santiaguiño, chea de motivos xacobeos. Unha vez iniciado o camiño, coñeceron en profundidade a historia do Camiño Portugués percorrendo a Vía Romana XIX e o Camiño dos Frades e fixeron interesantes paradas no miliario romano de Vilar-Guizán-Louredo e no lugar de Padrón.

O Camiño do Movemento Down

Esta actividade enmárcanse no proxecto “O Camiño do Movemento Down”, que tanto a Federación como as súas entidades quixeron levar a cabo neste Ano Santo ao abeiro do programa “O Teu Xacobeo” da Xunta de Galicia.

Esta iniciativa creouse para ofrecer ás persoas vencelladas á Federación e ás entidades Down en Galicia un espazo de encontro e participación no que compartir inquedanzas e experiencias en torno ás persoas coa síndrome de Down e discapacidade intelectual e ás súas familias, así como aumentar o sentimento de unión e de pertenza ao movemento asociativo desta discapacidade en Galicia.

Á súa vez, búscase que as persoas participantes gocen das rutas de diferentes Camiños de Santiago, aprendendo e desfrutando do patrimonio existente e da natureza que o envolve.

Inicialmente, este proxecto estaba distribuído en dúas fases, con 14 etapas intermedias durante os meses de verán e cunha etapa final de encontro entre tódalas persoas participantes que tivo que ser cancelada por mor da crise sanitaria derivada da pandemia da COVID-19.