O Servizo de Orientación Laboral de Down Galicia acumulou no pasado período 1.424 accións de orientación para un total de 252 persoas coa síndrome de Down e outras discapacidades intelectuais en busca activa de emprego. O balance está encadrado entre febreiro de 2020 e xaneiro de 2021, no caso das profesionais de orientación das provincias de A Coruña e Pontevedra, e de agosto de 2020 a agosto de 2021 da profesional que da servizo ás provincias de Lugo e Ourense.

As accións de orientación realizadas van encamiñadas a facilitarlle estratexias e recursos axeitados ás persoas inscritas na bolsa de demandantes do Servizo de Orientación de Down Galicia, de xeito que a súa busca activa de emprego sexa máis efectiva. Os grandes grupos de accións de orientación laboral compóñense de entrevistas personalizadas (1.042), sesións grupais (235) e entrevistas fóra de axenda debido maiormente ás situacións de ERTE (147), co obxectivo de dar resposta ás necesidades das persoas demandantes de emprego en función do seu perfil profesional.

Por outra banda, tamén se levaron a cabo 33 itinerarios personalizados de inserción e se mantiveron reunións ou entrevistas telefónicas coas familias, chegando a un total de 161 nos meses analizados. Ademais de 115 visitas e contactos con entidades públicas e privadas, así coma 2 empresas de ámbito autonómico visitadas e contactadas. Finalmente, este labor desenvolveuse grazas á coordinación co persoal técnico de Emprego das entidades Down e o equipo de Down Galicia, cun total de 344 reunións.

A raíz da crise sanitaria por mor da pandemia da Covid-19, moitas das accións deste período realizáronse a distancia. Deste xeito, a través de distintas plataformas e aplicacións, as persoas usuarias do servizo nestas zonas puideron seguir recibindo asesoramento personalizado en materia laboral.

O servizo conta con persoal técnico especializado e realiza as súas actuacións nas principais cidades galegas. Para iso, conta con tres orientadoras laborais, que prestan servizo itinerante desde os tres centros de traballo, situados en Santiago de Compostela, Vigo e Ourense, para dar cobertura á provincia de A Coruña -Ferrol, A Coruña, e Compostela-; á provincia de Pontevedra -Pontevedra e Vigo-; e ás provincias de Ourense e Lugo -Ourense, Lugo e Monforte de Lemos-, respectivamente.

O Servizo de Orientación Laboral de Down Galicia é centro colaborador do Servizo Público de Emprego de Galicia, tendo competencias en materia de modificación de datos e actualización dos currículos das persoas demandantes derivadas á entidade. Durante o período referenciado, este servizo foi financiado pola Consellería de Economía, Emprego e Industria, a través da Dirección Xeral de Orientación e Promoción Laboral.