O Comité de Entidades Representantes de Persoas con Discapacidade de Galicia (CERMI Galicia) quixo conmemorar onte o Día Internacional das Persoas con Discapacidade, que se celebra hoxe en todo o mundo, cun acto institucional no que participou a Conselleira de Política Social, Fabiola García Martínez, e o Director Xeral de Maiores e Persoas con Discapacidade, Fernando González Abeijón.
O evento, celebrado no CEGADI, acolleu a presentación dun vídeo conmemorativo que conta, a través de testemuños e experiencias de persoas con discapacidade, como lles gustaría ser tratadas, cunha mención especial á terminoloxía usada no artigo 49 da Constitución. Posteriormente deuse lectura ao manifesto que se elaborou para conmemorar este día por parte de dúas persoas con discapacidade.
Precisamente, este ano o manifesto, elaborado polo CERMI Estatal e ao que se adheriu o CERMI Galicia, reclama a todas as formacións políticas que apoien a reforma do artigo 49 do texto constitucional porque nin a terminoloxía empregada nin o contido “están aliñados coa visión plena de dereitos humanos, que é a única abordaxe admisible en relación coa discapacidade”.
Ao acto asistiron tamén o presidente do CERMI Galicia, Luciano Fernández; e o secretario xeral da entidade, Carlos Fernández, acompañados de 45 persoas en representación das distintas discapacidades.
Baixo o mesmo paraugas
Por outra banda, varias das entidades Down de Galicia súmanse un ano máis á iniciativa #BaixoOMesmoParaugas,
Como cada ano, máis de 90 entidades sociais de toda Galicia únense para conmemorar o Día Internacional das Persoas con Discapacidade enchendo de cor o ceo galego con milleiros de paraugas.
Se queres unirte á cadea de bos desexos de futuro para o colectivo, só tes que seguir estes pasos:
- Fai unha foto abrindo un paraugas
- Súbea ás túas redes cunha mensaxe positiva e os hashtags #BaixoOMesmoParaugas e #ParaugasPolaDiscapacidade
- Etiqueta aos teus contactos e rétaos a facer o mesmo
- Etiqueta a @galiciadiversa para que se poida estender a cadea
