Fai xa unha semana que Samuel Molanes, usuario de Down Vigo, entrou a formar parte do equipo de traballo do local que a cadea de restaurantes de comida rápida Taco Bell acaba de abrir no centro comercial Vialia. Trátase do primeiro local en Vigo desta marca estadounidense especializada en produtos de cociña Tex-Mex.

As súas tarefas fundamentais consistirán na recollida e mantemento do salón do restaurante, así como a montaxe das caixas do servizo de pedidos para levar e a domicilio. Por iso, Samuel terá a oportunidade de aplicar nunha contorna laboral ordinaria toda a súa formación e experiencia no sector da hostalería, como a participación na acción formativa teórico-práctica ‘Operacións básicas de restaurante-bar’ ou as súas prácticas laborais dentro do Programa Valuable nun hotel de Milán.

Desde o Movemento Down de Galicia agradecemos á empresa a oportunidade de seguir avanzando na inclusión laboral das persoas coa síndrome de Down e outras discapacidades intelectuais e desexamos a Samuel moita sorte nesta nova experiencia.