O club de baloncesto Río Breogán dedicou o encontro do pasado domingo ante o Morabanc Andorra a visibilizar o labor da asociación Down Lugo. A iniciativa foi presentada a pasada semana no Pazo de San Marcos, nun acto no que participaron o deputado de Deportes, Efrén Castro; o director xeral do CB Breogán, Tito Díaz; e a presidenta de Down Lugo, María José Blanco.

Coincidindo co encontro, persoas socias da asociación deron a coñecer o seu labor, centrado en actividades dirixidas a mellorar a calidade de vida das persoas coa síndrome de Down e das súas familias a través da súa inclusión efectiva na sociedade, e venderon participacións da lotería de Nadal.

María José Blanco, presidenta da entidade, agradeceu a colaboración do CB Breogán e da Vicepresidencia da Deputación de Lugo nesta iniciativa. Pola súa banda, Efrén Castro, deputado de Deportes, e Tito Díaz, director xeral do CB Breogán, coincidiron en sinalar a satisfacción de colaborar con este tipo de accións sociais.

Esta iniciativa desenvólvese no marco do acordo de patrocinio co que a Vicepresidencia da Deputación de Lugo apoia ao CB Breogán e que inclúe, entre outras accións, a participación do club en iniciativas de sensibilización e visibilización realizadas por entidades sociais, no fomento do deporte e dos hábitos saudables con visitas a centros educativos ou na posta en valor de recursos e espazos culturais, patrimoniais e ambientais.