Anxo, integrante do servizo de Emprego con apoio de Down Vigo, acábase de incorporar ao equipo de traballo de Nueva Pescanova como operario de produción. Trátase da segunda persoa da entidade que desenvolve o seu traballo nas instalacións que a empresa ten en O Porriño, sumándose ás tres que están contratadas na factoría de Chapela.

Cun contrato inicial de seis meses e tras unha formación teórica previa, Anxo está a traballar como operario na liña de produción onde se realizan as tarefas de selección e encaixado do produto.

Desta maneira, ten a oportunidade de ampliar a súa capacitación profesional nun novo perfil laboral, que se suma á súa experiencia previa como operario de automoción e como repoñedor.

Tralo primeiro contacto co seu novo posto de traballo, Anxo asume con ilusión a súa nova responsabilidade.

Desde o Movemento Down de Galicia agradecemos a Nueva Pescanova a confianza no programa Emprego con Apoio e a oportunidade de seguir sumando esforzos para conseguir a inclusión laboral das persoas coa síndrome de Down e outras discapacidades intelectuais e, por suposto, desexamos a Anxo toda a sorte nesta nova experiencia.