O último trimestre deste 2021 que está a piques de rematar, está traendo boas novas para varias das persoas que forman parte da bolsa de emprego de Down Pontevedra Xuntos. O bo funcionamento do programa Emprego con Apoio que desenvolve a entidade xera confianza no tecido empresarial da cidade, que valora as capacidades das persoas coa síndrome de Down e outras discapacidades intelectuais para ocupar postos de traballo nas súas compañías.
Desta forma, Tanatorio San Marcos decidiu colaborar por vez primeira co programa de emprego contratando a Cecilia de los Santos como auxiliar de servizos funerarios durante un ano. Cecilia compaxina este traballo con outro como ordenanza na empresa Coworking Espacio Arroelo, na que comezou a traballar hai 5 anos, pasando a ser indefinida en 2019.
Pola súa banda, a produtora de cine Matriuska Producciones, que xa colaborara anteriormente contratando a unha persoa usuaria da bolsa de emprego de Xuntos, incorporou ao seu equipo de traballo a Verónica Rosales, que está a desempeñar o posto de auxiliar de produción, realizando tarefas de apoio á secretaria de produción.
Verónica destaca que está aprendendo “moitas tarefas novas, como escanear, organizar documentos ou outras tarefas administrativas” e fai fincapé en que tamén lle gustou “participar en tarefas do Festival Novos Cinemas”.
E un ano máis, Distribuciones Froiz, que colabora con Xuntos desde o inicio do programa de emprego no ano 2004, contratou a dúas persoas usuarias da entidade para esta campaña de Nadal. Así, José Carlos Martínez e Helga García están a traballar como mozos de almacén elaborando as cestas coas que as distintas empresas agasallan aos seus traballadores e traballadoras.
José Carlos comenta que está “moi a gusto cos compañeiros de traballo” e quere “agradecer a oportunidade de traballar e o apoio recibido”. Helga, pola súa banda, indica que “é un traballo no que estou moi contenta, hai moi bo compañerismo” e está segura de que “cando remate a campaña de Nadal vou botar de menos este traballo”.
Non obstante, todos estes contratos son de carácter temporal, o que dificulta a consecución dun proxecto de vida a longo prazo para as persoas coa síndrome de Down e outras discapacidades intelectuais.
Balance anual do programa de emprego de Xuntos
Desde hai xa algúns anos, a bolsa de emprego de Down Pontevedra Xuntos está sendo sinónimo de eficacia e é que o 76,2% das persoas que forman parte do Programa Emprego con Apoio da entidade estiveron activas nalgún momento de 2021.
O ano que está a punto de rematar amosouse bastante produtivo en canto a empregabilidade, xa que 16 das 21 persoas usuarias do programa contaron cunha oportunidade laboral no período, sendo 8 delas unha nova contratación. Ademais, asináronse 2 prórrogas de contratos.
Por outra banda, é salientable ó número de empresas colaboradoras neste 2021, sumando nesta ocasión 21 colaboracións.
A metodoloxía Emprego con Apoio
Desde hai case 20 anos, as entidades Down en Galicia desenvolven o programa Emprego con Apoio, deseñado para atender especificamente as necesidades e barreiras que as persoas coa síndrome de Down e outras discapacidades intelectuais atopan á hora de intentar acceder ao mercado laboral ordinario. Avalada polos seus bos resultados, esta metodoloxía estase a consolidar como unha estupenda fórmula de inserción laboral para aqueles colectivos con máis dificultades á hora de atopar un traballo.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un novo emprego contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que a persoa empregada poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros e compañeiras de traballo e na mediación na relación con eles para que se desenvolva de maneira positiva e natural.
Trátase, en definitiva, de prestar ás persoas con discapacidade intelectual os medios, os recursos e os apoios necesarios que faciliten a súa participación no mercado laboral da súa comunidade da mesma maneira que o resto de cidadáns e cidadás, favorecendo, deste xeito, a súa incorporación ou a súa estabilidade laboral e, de forma máis extensa, a súa inclusión social.