A Federación Down Galicia converteuse o pasado sábado, 25 de decembro, na primeira entidade social en recibir o petisco solidario da edición de Nadal do programa da TVG ‘Atrápame se podes’.
O concurso presentado por Paco Lodeiro está a emitir nestas dúas semanas dez programas especiais, nos que os e as concursantes son caras coñecidas da canle pública que loitan por conseguir o bote solidario para doalo a distintas entidades galegas.
A contía doada depende do éxito dos e das concursantes nas distintas probas. A habitual fase das escaleiras non será definitiva para chegar ao bote, xa que quen gañe esa proba asegurará o petisco para a entidade social que corresponda ese día, pero terá que someterse á nova proba do Minuto final para ser quen de conseguir o bote.
No primeiro programa, Esther Estévez, Roberto Vilar, Teté Delgado, Pepe Capelán e Trisha Fernández concursaron por un bote de 1.500€, pero ao non superar Teté Delgado a proba do Minuto final, Down Galicia quedou co petisco de 1.000€.
Ademais da Federación, ‘Atrápame se podes’ repartirá os 18.000€ en xogo á Fundación Meniños de Protección á Infancia e á Adolescencia; á Federación Galega de Enfermidades Raras (Fegerec); á Asociación Mirabal de axuda a vítimas de violencia machista e axuda ao menor; á Federación Galega de Bancos de Alimentos; á Federación Galega de Alzheimer; á Asociación Galega de Afectados de ELA; á Federación Galega a Favor de Persoas con Discapacidade Intelectual; á Asociación de Nenas, Nenos e Xente Nova con Diabetes e á Asociación de Axuda a Nenos Oncolóxicos de Galicia.
Desde a Federación Down Galicia queremos agradecer esta iniciativa da Televisión de Galicia e desexar moitísima sorte aos e ás concursantes para os vindeiros programas.