O deporte é un entretemento divertido e san que debe ser practicado por todo o mundo, a todas as idades e sen distinción de condición nin capacidades. A práctica do deporte leva consigo unha mellora das habilidades sociais e físicas, que favorece moi especialmente ás persoas con algún tipo de discapacidade: mellora da coordinación xeral, axuda coa postura corporal, desenvolvemento da orientación espacial, desenvolvemento da forza, resistencia, flexibilidade e ton muscular, ou mellora no nivel progresivo da aprendizaxe e da autoestima.
Por este motivo, no último trimestre de 2021, Xuntos asinou varios convenios de colaboración con entidades deportivas da súa contorna.
En primeiro lugar, o Club de Taekwondo Taekanart, co obxectivo de que as persoas usuarias, socias e familias de Xuntos poidan participar nas súas sesións, ofrece un desconto do 15% na cota do club.
Por outra banda, o CAB Club Baloncesto Pontevedra facilitará entradas ás persoas usuarias da entidade para que poidan acudir a partidos oficiais dos equipos do club. Así mesmo, animan ás persoas interesadas en xogar ao baloncesto a informarse e participar activamente no equipo.
Por último, o convenio co MARÍN FUTSAL facilitará entradas para que as persoas vencelladas a Xuntos poidan asistir aos seus partidos e levará a cabo accións de visibilidade co fin de incluír ás persoas con discapacidade na sociedade.
A importancia do deporte inclusivo
Todas as persoas, con e sen discapacidade, teñen dereito a establecer os seus propios obxectivos e plans de deporte.
Grazas á práctica do exercicio, adquírense e desenvólvense habilidades e destrezas como as mencionadas anteriormente, prevéñense enfermidades e mellórase a forma física, entre outros beneficios. A nivel social e emocional, practicar deporte permite ás persoas con discapacidade intelectual mellorar a súa autoestima e a percepción de si mesmos, ensínalles a coidarse e a divertirse mentres forxan amizades e amplía o seu círculo social. Ademais, estes beneficios teñen unha transferencia directa a outras áreas da súa vida, cun valor incuestionable.
Por este motivo, as entidades Down de Galicia traballan desde hai anos co obxectivo de impulsar o deporte como unha ferramenta de inclusión das persoas coa síndrome de Down e outras discapacidades intelectuais na sociedade.