A Consellería de Emprego e Igualdade, a través da Dirección Xeral de Emprego, Traballo Autónomo e Economía Social, financia a contratación de 11 persoas para desempeñar distintos postos de carácter técnico no programa de inserción laboral da Federación Down Galicia.
Trátase da contratación entre agosto de 2021 e decembro de 2022 de 6 axentes de emprego e 5 unidades de apoio, todos a xornada completa e con contratos de 12 meses de duración.
O obxecto desta achega, que ascende aos 253.006,43 euros, é o de financiar accións de fomento do emprego a través da contratación de profesionais que realicen funcións relacionadas coa dinamización e coa creación de emprego no ámbito das persoas con discapacidade: valoración e orientación das persoas usuarias, intervención con familias, inclusión socio-laboral, prospección en empresas ordinarias e medición da satisfacción de todos os axentes implicados, entre outras.
Down Galicia leva desenvolvendo actuacións relacionadas coa promoción do emprego para persoas con discapacidade intelectual desde o ano 2002, a través da posta en marcha do proxecto “Emprego con apoio”, cuxo obxectivo está centrado na inserción laboral na empresa ordinaria.