Xoel Pardo Pazó e Samuel Martínez Ares, dous mozos coa síndrome de Down usuarios da asociación Down Coruña, acaban de incorporarse ao equipo de traballo de Esco Expansión, firma especialista na recuperación e cobranza de débedas.

Tras formarse como auxiliares de servizos xerais de administración, Xoel e Samuel desenvolverán o seu traballo nesta empresa como auxiliares administrativos.

Para Samuel Martínez esta oportunidade laboral supón un paso máis na súa carreira profesional dentro do ámbito da administración, xa que previamente traballou durante máis de dous anos nun posto similar, con atención ao público, en Down Coruña e tres meses nunha sucursal bancaria.

Xoel Pardo, en cambio, enfróntase á súa primeira experiencia laboral, aínda que previamente realizou prácticas en empresas desenvolvendo tarefas similares ás que desde a pasada semana ocupan a súa xornada laboral.

Manuel Rego, director executivo de Down Coruña, destaca a oportunidade laboral que supón para Xoel e Samuel esta incorporación. “Ambos se prepararon e están listos para integrarse nun equipo de traballo no que achegarán a súa valía como profesionais e como persoas. Esta experiencia laboral supoñerá para eles, como para calquera outra persoa, unha oportunidade e achegaralles un crecemento persoal. Pero, ademais, que eles poidan traballar nunha empresa como Esco Expansión, serve para visibilizar que as persoas coa síndrome de Down están en condicións de sumar ao tecido empresarial”.

Desde Esco Expansión cualifican a experiencia como “moi positiva”. Juan Pita Romero, director da delegación en Galicia, explicaba respecto destas incorporacións que na empresa querían “facer cousas novas en materia de inclusión laboral, pero non só é cuestión de querer facelo, senón tamén de poder”. Pita engade que “o persoal recibiunos de marabilla. Samuel, que leva xa uns días, está totalmente integrado”.