© Carlos Pardellas
Hai pouco máis de dúas semanas que Pilar Pouso Ruocco, unha moza coa síndrome de Down usuaria da asociación Down Coruña, comezou a traballar como parte do staff do Hóckey Club Liceo. Tras un período de prácticas de dous meses de duración no que demostrou estar máis que preparada para o desempeño das funcións encomendadas, o afamado club coruñés contratouna como axudante de Fran Tato, utilleiro do equipo.
Así, durante os adestramentos catro días á semana e aqueles sábados nos que o Liceo xoga o seu partido como local, as súas tarefas consisten en levar o material á pista, ir buscar protectores e máscaras, fornecer de augas aos xogadores do equipo e recollelas ao finalizar, ordenar os sticks, devolver as bólas que saen da pista nos adestramentos, recoller os tallos, pechar as portas da pista, axudar aos xogadores nas pequenas cousas que poidan necesitar ou algunhas tarefas de lavandería, entre outras.
Esta contratación, dunha duración inicial de 6 meses con posibilidade de renovación, foi iniciativa do capitán do Hóckey Club Liceo, Dava Torres, que tras a campaña “1 partido, 1 causa” que dedicaron á asociación Down Coruña, mostrou o seu interese en que o club contratase a unha persoa do programa de emprego da entidade.
Este é o primeiro contrato de traballo que asina Pili e tanto ela como a súa familia móstranse moi contentas e agradecidas con esta oportunidade. De igual modo, Down Coruña quere destacar o interese mostrado desde o inicio das conversacións co club, que con esta incorporación demostra que a inclusión laboral das persoas coa síndrome de Down e outras discapacidades intelectuais é posible.