Con motivo da conmemoración do Día da Muller o pasado 8 de marzo, a Fundación Down Compostela estreou a mostra “Iguais.gal”, un proxecto de formación, sensibilización e promoción da autonomía que ten por obxectivo reivindicar a diversidade, o feminismo e as novas tecnoloxías coma elementos clave nunha sociedade libre, plural e democrática na que todas e todos sumamos.
A exposición, que contou para a súa creación coa participación de 47 persoas usuarias do Programa de Inclusión Social e Laboral da entidade, recolle a vida de 12 mulleres galegas que deixaron a súa pegada na comunidade: Luz Fandiño Rodríguez, Susana Rodríguez Gacio, Carmen Avendaño Otero, Maruja Mallo, Antía Cal Vázquez, Irmáns Touza Domíguez, Margarita Ledo Andión, Ángeles Alvariño González, Tanxugueiras, as heroínas de Sálvora, María Miramontes Matos e Teresa Cuíña Vence.
O camiño ata o momento da estrea foi longo, partindo de reunións de traballo nas que a chuvia de ideas e o debate concluíron na definición da proposta e o deseño metodolóxico. Unha vez pechado este punto, iniciouse un proceso de selección de historias axustándose aos criterios establecidos: mulleres galegas dos séculos XX e XXI que representasen diferentes eidos.
Tras esta selección iniciouse a segunda fase do proxecto, máis centrada na investigación e a composición, comezando coa elaboración dos textos, a gravación dos audios e a xeración dos códigos QR para os carteis definitivos.
Onde se pode ver a exposición?
Todas aquelas persoas que queiran desfrutar da exposición, poden facelo no Centro Sociocultural de Fontiñas (Rúa Berlín, 13) e no Módulo B1 da Facultade de Ciencias da Educación – Campus Vida (Rúa Xosé María Suárez Núñez) ata o vindeiro 18 de marzo de 2022.
Coñece máis sobre a iniciativa a través deste vídeo:
