A Capela Real do Hostal dos Reis Católicos de Santiago de Compostela acollerá o vindeiro 21 de marzo, a partir das 20:30 horas, os actos conmemorativos do Día Mundial da Síndrome de Down. Nesta ocasión, o acto organizado de forma conxunta pola Fundación Down Compostela e a Federación Down Galicia, ten como principal obxectivo o agradecemento á sociedade pola súa implicación desinteresada na inclusión das persoas coa síndrome de Down e outras discapacidades intelectuais.
Neste día, no que tamén se conmemorará o 25 aniversario da Fundación Down Compostela e se entregarán os IX Premios Down Compostela, as persoas coa síndrome de Down e outras discapacidades intelectuais volverán ser as protagonistas da gala, xa que serán as encargadas de conducir o acto, ler o Manifesto do Día Mundial da Síndrome de Down e entregar os mencionados Premios da Fundación.
Premios Down Compostela
A Fundación Down Compostela acordou nesta ocasión recoñecer o traballo que veñen realizando a doutora María José Fernández Seara, o artista Xurxo Martiño e a empresa Emetel concedéndolles os Premios Down Compostela 2022 pola súa implicación na mellora da saúde das persoas coa síndrome de Down e outras discapacidades, por promover a expresión artística das persoas con trisomía 21 e por favorecer a súa inclusión laboral no campo das novas tecnoloxías.
A entrega destes galardóns, que xa foron notificados no ano 2020, quedou suspendida ata o momento actual por mor da situación de crise sanitaria derivada da pandemia da COVID-19.
Doutora María José Fernández Seara
Pola súa contribución a mellorar a saúde e a calidade de vida das persoas coa síndrome de Down e outras discapacidades. A doutora Seara, neonatóloga no Complexo Hospitalario de Santiago, implantou en 2002 o Protocolo de seguimento da saúde de nenas e nenos coa síndrome de Down desde o seu nacemento, seguindo as recomendacións do Programa de Saúde de Down España. Un programa de medicina preventivo que, máis aló dos coidados médicos, deriva aos nenos e nenas aos servizos de Atención Temperá e coordina a atención con outros especialistas.
Xurxo Martiño
Por poñer toda a súa creatividade e saber artístico a disposición de mozas e mozos coa síndrome de Down, que atopan na pintura unha forma de realización e superación persoal. Fai case vinte anos que Xurxo Martiño traballa con Carla Lojo e Álvaro Díez, dous mozos de Down Compostela, artistas xa recoñecidos e premiados. A través da pintura, axudoulles a ser eles mesmos como persoas e como artistas, cada cal coa súa particular forma de ver, plasmar e interpretar o mundo que lles rodea.
Emetel
Pola súa aposta en favor da inclusión laboral das persoas coa síndrome de Down e discapacidade intelectual no campo das altas tecnoloxías, a ciberseguridade e os servizos dixitais. Desde 2017 esta consultora con sede social en Oleiros desenvolve un programa de responsabilidade social empresarial que facilitou en 2018 a contratación de Carlota Rodríguez, unha moza da Fundación que desenvolve a súa carreira profesional en Emetel con plena satisfacción por ambas as partes.
O premio consistirá nunha escultura do artista compostelán Cándido Pazos feita especialmente para representar estes galardóns: unha man montada sobre unha base de cuarzo do Pico Sacro. “A man é a máxima expresión do ser humano”, sinala o artista, quen utilizou as cores corporativas da Fundación (azul, amarelo e gris) para esmaltar as pezas. Coas mans, Cándido Pazos pretende simbolizar o apoio que os premiados deron ás persoas con síndrome de Down e a recompensa que recibiron por iso.
Iluminación dos principais monumentos de Galicia
Os principais monumentos das sete grandes cidades de Galicia conmemorarán o luns o Día Mundial da síndrome de Down. A Cidade da Cultura, a fonte de Catro Camiños, as catedrais de Santiago de Compostela e Lugo, a Ponte Romana de Ourense, o Teatro Jofre de Ferrol, a Deputación de Pontevedra ou os concellos de Santiago de Compostela e Pontevedra, entre outros, serán iluminados de azul e amarelo na tarde-noite deste luns 21 de marzo.
Nacións Unidas aprobou en novembro de 2011 a declaración do 21 de marzo como Día Mundial da síndrome de Down. Establécese esta data, o 21 de marzo [21/03] como un símbolo, en referencia á triplicación [trisomía] do cromosoma 21 que se traduce na condición xenética da síndrome de Down.
