O director xeral de maiores e persoas con discapacidade, Fernando González Abeijón, a comisaria do Xacobeo, Cecilia Pereira, o presidente da Federación Down Galicia, Delmiro Prieto, e membros da Fundación Down Compostela participaron hoxe no acendido da Torre da Berenguela da Catedral de Santiago, con motivo da conmemoración do Día Mundial da Síndrome de Down. Este e outros monumentos emblemáticos de toda Galicia iluminaranse desde hoxe ata o domingo 20, data previa á celebración internacional, coa cariña representativa do Movemento Down en Galicia e a frecha do Camiño de Santiago.
Delmiro Prieto González destacou a importancia dunha xornada coma a do Día Mundial da Síndrome de Down, que axuda a “dar visibilidade á realidade do colectivo de persoas con esta alteración cromosómica”, aínda que o ideal sería que chegase o momento “no que non se teñan que celebrar tantos ‘Días de’, que poñen de manifesto que algo falla na sociedade, senón conmemorar o día no que non haxa nada que celebrar”. Así mesmo, quixo agradecer á Xunta a súa aposta pola concienciación pública sobre a síndrome de Down, así como a súa colaboración na iluminación dos monumentos e na organización destes actos.
Actos simultáneos noutros puntos de Galicia
Representantes da administración autonómica e das entidades Down de Galicia participaron tamén nos actos simultáneos de acendido dos monumentos en outras cidades de Galicia.
Así, o delegado territorial da Xunta en Lugo, Javier Arias, e María José Blanco Freire, presidenta de Down Lugo, participaron no acendido da Catedral da cidade lucense, onde persoas usuarias da entidade leron o manifesto do Movemento Down para este 2022; e a delegada territorial da Xunta en Vigo, Marta Fernández-Tapias, acompañou aos representantes da xunta directiva de Down Vigo no acendido da iluminación da sede da Delegación Territorial na cidade olívica.
21 de marzo, Día Mundial da Síndrome de Down
En decembro de 2011, a Asemblea Xeral das Nacións Unidas designou o 21 de marzo Día Mundial da Síndrome de Down. Con esta celebración, a organización internacional quere xerar unha maior conciencia pública sobre a cuestión e lembrar a dignidade inherente, a valía e as valiosas contribucións das persoas con discapacidade intelectual como promotores do benestar e da diversidade das súas comunidades. Así mesmo, quere resaltar a importancia da súa autonomía e independencia individual, en particular a liberdade na toma das súas propias decisións.
