Con motivo do Día Mundial da síndrome de Down, persoas usuarias da asociación Down Ourense quixeron reivindicar onte á tarde nas rúas da cidade os dereitos do colectivo coa organización dun acto para sensibilizar á sociedade ourensá.

Situada na intersección das rúas do Paseo e da Concordia, a entidade colocou unha mesa informativa para explicar a metodoloxía de traballo que distingue ás entidades Down de Galicia, baseada na mellora da calidade de vida de cada persoa coa síndrome de Down e outras discapacidades intelectuais e das súas familias, a través da inclusión social e da utilización dos recursos ordinarios da comunidade.

Ademais, calquera persoa que o desexase tivo oportunidade de deixar a súa mensaxe no panel co que a asociación quixo facer reflexionar ás persoas que se achegaron ao stand.

Na inauguración do acto participaron o delegado territorial da Xunta en Ourense, Gonzalo Alén; a deputada provincial da área de Benestar Social, Luz Doporto; e o tenente alcalde do concello de Ourense, Armando Ojea, que acompañaron á vicepresidenta de Down Ourense, Mª del Mar Prieto Fortes, e a todas as persoas usuarias alí presentes.

Pero o momento máis destacable foi a lectura do manifesto elaborado con motivo da sinalada data, co que os membros da entidade levantaron a súa voz e reclamaron os seus dereitos. Tamén quixeron dar as grazas a aquelas persoas e entidades que entenden que a inclusión é a base de calquera sociedade e instaron a todos e todas a seguir traballando para derrubar barreiras e alcanzar a igualdade de oportunidades nun mundo máis xusto para todas as persoas, independentemente das súas características.

Sensibilización en centros educativos e bibliotecas

Ademais deste acto central, Down Ourense participou tamén en distintas actividades durante toda a xornada co obxectivo de sensibilizar ás e aos máis pequenos sobre a importancia da inclusión e sobre as capacidades das persoas coa síndrome de Down e outras discapacidades intelectuais.

Así, durante a mañá deste luns, profesionais da entidade desprazáronse ata o IES de Quiroga (Lugo) para impartir dúas charlas de sensibilización a alumnado de 1º de ESO. A través do xogo “Quen é quen?” trataron de romper estereotipos e prexuízos sobre o que poden e non poden facer as persoas coa síndrome de Down. Ao finalizar a dinámica, realizaron un pequeno mural cos mitos e realidades tradicionalmente relacionadas a esta anomalía  cromosómica e resolveron as dúbidas que xurdiron ao respecto.

Pola tarde, a asociación organizou un contacontos-obradoiro para nenos e nenas de entre 6 e 12 anos na Biblioteca Pública da cidade. A actividade iniciouse coa narración do conto “O cazo de Lorenzo” e continuou cun pequeno taller de creación de marcapáxinas personalizados que cada persoa participante puido levar para casa.

Estas accións están incluídas dentro dos actos que a asociación Down Ourense e o movemento Down Galicia levaron a cabo para conmemorar o Día Mundial da síndrome de Down, que se celebrou onte en todo o mundo.