Con motivo do Día Mundial da síndrome de Down, a asociación Down Lugo colocou na tarde de onte na Praza Maior da cidade unha mesa informativa para dar visibilidade ao traballo da entidade e sensibilizar acerca das capacidades das persoas coa síndrome de Down.
En primeira persoa, mozos e mozas da asociación foron as encargadas de desmontar mitos e prexuízos sobre a síndrome de Down, e reivindicaron unha vez máis os seus dereitos como cidadáns e cidadás de pleno dereito, incidindo na importancia da inclusión e da eliminación das barreiras existentes na contorna.
Acompañados por Máximus, a mascota do Club Baloncesto Breogán, tamén entregaron chapas conmemorativas e animaron á sociedade lucense a sacar fotografías no photocall colocado para a ocasión.
Ademais, para continuar conmemorando o Día Mundial da síndrome de Down, o Breogán tamén colaborará con Down Lugo dedicándolle o partido que xogará o vindeiro sábado 26 de marzo contra o Obradoiro no Pazo dos Deportes da cidade.
Estas accións están incluídas dentro dos actos que a Asociación Down Lugo e o movemento Down Galicia levaron a cabo para conmemorar esta sinalada data.
