Con motivo do Día Mundial da síndrome de Down, Down Pontevedra Xuntos quixo reivindicar a importancia da inclusión das persoas coa síndrome de Down e outras discapacidades intelectuais involucrando á sociedade pontevedresa no seu cometido.
Así, situados na Praza da Peregrina, nas inmediacións do Hospital Provincial e preto da sede de Xuntos na Rúa Gorgullón, a entidade colocou tres photocalls nos que animaban a todas aquelas persoas que o desexasen a sacar unha fotografía e subila a redes sociais mencionando á asociación e incluíndo o hashtag #inclusion.
Ata estes lugares tamén se achegaron distintos persoeiros da cidade, que coas súas fotografías quixeron concienciar sobre a importancia das sociedades plurais e diversas. Deste xeito, non deixaron pasar esta oportunidade o actor David Amor; a influencer Natalia Maquieira; o alcalde da cidade, Miguel Anxo Fernández Lores; o concelleiro de benestar social, Marcos Rey Pazos; ou Alberto Ribas, do blog Alvientooo, entre outras.
Pero ademais desta acción a pé de rúa, persoas usuarias da asociación quixeron reivindicar unha vez máis os seus dereitos participando en dúas lecturas públicas do Manifesto do Movemento Down polo Día Mundial da Síndrome de Down. Así, aproveitando a proxección da película Valentina nos concellos de Cambados e Soutomaior, Ángeles e Matías alzaron a súa voz en nome de todas as persoas vencelladas ás entidades Down de Galicia para dar as grazas a aquelas persoas e entidades que entenden que a inclusión é a base de calquera sociedade e instaron a todos e todas a seguir traballando para derrubar barreiras e alcanzar a igualdade de oportunidades nun mundo máis xusto para todas as persoas, independentemente das súas características.
Sensibilización en centros educativos
Ademais destes actos, Xuntos está a participar tamén en distintas actividades durante estas semanas co obxectivo de sensibilizar ás e aos máis pequenos sobre as capacidades das persoas coa síndrome de Down e outras discapacidades intelectuais.
A Escola infantil O Grupo (Marín), o CEIP Plurilingüe de Carballedo (Cotobade), o CEIP Santo André de Xeve (Pontevedra) e o CEIP San Martiño (Pontevedra) son os centros educativos nos que profesionais e persoas usuarias da entidade están a dar visibilidade á importancia de que todos os nenos e nenas compartan espazo nas aulas e no moito que as persoas coa síndrome de Down e outras discapacidades intelectuais poden ofrecer á sociedade da que forman parte.
Ademais, o vindeiro 30 de abril Xuntos participará en A Hora do Conto, unha actividade organizada por Pavís Pavós en colaboración co Concello de Pontevedra, que procura o fomento da lectura entre a cativada.
Outras accións
O edificio do Concello de Pontevedra lucirá durante estes días unha pancarta de Down Pontevedra Xuntos con motivo desta sinalada data. A colocación da mesma tivo lugar onte coa presenza do alcalde, Miguel Anxo Fernández Lores, o concelleiro de Benestar Social, Marcos Rey, e o presidente de Xuntos, Manuel Pérez Cabo.
Estas accións están incluídas dentro dos actos que a asociación Down Pontevedra Xuntos e o movemento Down Galicia levaron a cabo para conmemorar o Día Mundial da síndrome de Down.