A Federación Down Galicia e a Asociación de Centros de Día de Galicia acaban de asinar un convenio de colaboración que ten por obxecto a posta en marcha e desenvolvemento de distintas medidas relativas ao avance no proceso de envellecemento activo e saudable das persoas coa síndrome de Down e outras discapacidades intelectuais, así como á promoción da súa correcta atención.

Este acordo céntrase en propostas como o intercambio de información sobre o perfil e as necesidades do colectivo de persoas con discapacidade intelectual na etapa do envellecemento, o deseño e posta en marcha de programas de envellecemento activo e saudable, a busca de fórmulas para mellorar o proceso de envellecemento do colectivo ou a promoción de accións que contribúan a unha maior visibilización, participación e inclusión das persoas maiores con discapacidade intelectual en programas e servizos da comunidade, entre outras.

O envellecemento das persoas coa síndrome de Down

Envellecer é un proceso natural para todas as persoas, pero non deixa de ser unha conquista para aquelas que teñen síndrome de Down. Na actualidade a esperanza de vida das persoas con esta alteración cromosómica sitúase ao redor dos 60 anos.

Este logro vén derivado do estudo e do coñecemento exhaustivo da realidade e necesidades do colectivo, dando lugar a unha mellora exponencial da súa calidade de vida e, moi especialmente, a unha mellor e máis especializada atención no campo da saúde. Por suposto, tamén polas melloras na atención social a través de entidades de apoio, mediante as que se conseguiu previr a dependencia e aumentar as cotas de autonomía das persoas pertencentes a este colectivo.

Pero a realidade é que as persoas coa síndrome de Down experimentan un proceso de envellecemento acelerado, polo que a partir dos 40-45 anos comezan a presentar trazos típicos da poboación envellecida.

Asumir esta nova realidade implica introducir as medidas necesarias que contribúan a alcanzar esta etapa vital coa maior calidade de vida posible e que permitan planificar este momento da vida da forma máis idónea.

Desde o Movemento Down de Galicia cren firmemente en que o modelo de vida inclusivo que promoven, que garante a participación en contornas e servizos comunitarios, terá unha repercusión positiva no envellecemento das persoas coa síndrome de Down e outras discapacidades intelectuais.

Sobre a Asociación de Centros de Día de Galicia

A misión de ACDgal é representar aos centros de día da Comunidade Autónoma de Galicia, velar polos seus dereitos, formalos e orientalos nas obrigas normativas, ademais de promocionar a participación activa colaborando con programas de terapias non farmacolóxicas, a estimulación, os coidados e a socialización das persoas maiores.