A asociación Down Vigo e o Consorcio Zona Franca de Vigo renovan o seu compromiso de colaboración cunha nova incorporación laboral que se fixo efectiva o pasado mes de marzo. A través da mesma, Julio Larrán, que asiste ao servizo de Emprego con Apoio da entidade, está actualmente traballando como conserxe nas instalacións da corporación en Bouzas. Trátase da sexta inserción laboral froito da cooperación entre ambas as entidades desde o ano 2013, despois das exitosas experiencias anteriores.
Tras unhas primeiras semanas coñecendo o posto de traballo, Julio amósase “moi contento” coa experiencia. Entre as súas tarefas principais atópanse a xestión documental de cartas e paquetes, así como manexo de máquinas reprodutoras de oficina. De todas elas, está especialmente satisfeito con “facer recados, porque lles estou ofrecendo un servizo aos compañeiros”. E precisamente neste desempeño é onde está a atopar tamén a súa maior dificultade: atopar a localización do persoal da oficina. Tal e como explica Julio, “o edificio é circular, e ás veces cústame atopar aos compañeiros. Cando me pasa iso, chamo por teléfono e axúdanme a situarme”.
Experiencia de inclusión laboral positiva
O delegado do Estado na Zona Franca de Vigo, David Regades, explicou que “esta experiencia está a ser gratificante para todas as persoas que formamos parte do Consorcio, porque o apoio á diversidade é fundamental para facer unha sociedade mellor e para atopar o talento. Down Vigo conta co noso apoio e pronto será realidade o seu novo centro de formación en Vigo, que impulsamos desde Zona Franca”.
