O Comité de Entidades Representantes de Persoas con Discapacidade de Galicia (CERMI Galicia) fixo valer as súas reivindicacións ante os diferentes grupos políticos nunha intervención na que resaltou asuntos de especial relevancia para as persoas con discapacidade.
Así se manifestou Luciano Fernández Pintor, presidente do CERMI Galicia durante a comparecencia que realizou o pasado venres ante o Parlamento de Galicia. A prevención, o desenvolvemento de programas preventivos centrados en hábitos de vida saudables que permitan frear o aumento de discapacidades adquiridas, a atención temperá ou a elaboración dun protocolo consensuado de derivación entre as diferentes áreas e servizos foron algunhas das reivindicacións expostas máis destacadas.
En materia de educación pediuse unha concreción do que se considera educación inclusiva e un aumento en profesorado especifico que poida atender as demandas do alumnado con discapacidade e outras necesidades educativas especiais.
No que respecta ao emprego, o desenvolvemento de campañas de sensibilización e información sobre as vantaxes e beneficios fiscais na contratación de persoas con discapacidade, a remodificación das bonificacións segundo o grao de discapacidade, o cumprimento da lei de infraccións e sancións respecto á vulneración de reservas de prazas ou á discriminación por condición de discapacidade, foron algunha das peticións.
Tamén realizaron reivindicacións no ámbito da sanidade, como a oportunidade de colaborar no Espazo Sociosanitario galego de atención a todas as discapacidades, “tanto desde a vertente da Consellería de Política Social como, simultaneamente, desde a de Sanidade” matizou.
No que se refire a política social, esixiron a axilización do desenvolvemento do Decreto do Concerto Social de Galicia.
Outros requirimentos centráronse na accesibilidade e participación na Comisión de seguimento para o cumprimento desta, así como a igualdade de establecer un espazo de colaboración coa Secretaría Xeral de Igualdade coa que poder traballar en favor das mulleres con discapacidade de Galicia.
O presidente de CERMI Galicia sinalou que “se debe obter o compromiso dunha interlocución máis frecuente, coa finalidade de resolver e facer un seguimento do noso colectivo”.