A Asociación de Familiares de Enfermos de Alzheimer da Coruña e Down Coruña selaron esta semana un acordo de colaboración para incorporar ao equipo de traballo de AFACO a Elvia Gabriela Javier Cortorreal, unha moza con discapacidade intelectual membro da entidade Down.
Elvia, que inicia así unha nova experiencia laboral na súa traxectoria profesional, contará cun contrato dun ano a media xornada como axudante de cociña.
Para prepararse para o seu novo posto de traballo, a moza sumou á súa formación como monitora de comedor escolar, outra como manipuladora de alimentos e unha sobre alérxenos e intolerancias alimentarias.
Previamente a esta incorporación, Elvia Cortorreal realizou prácticas na empresa Arume como auxiliar de comedores escolares no CEIP Novo Arteixo.
“Esta contratación súmase a outras en diferentes ámbitos profesionais e reafirma o traballo de formación e acompañamento en materia de emprego que desde Down Coruña realizamos para coas persoas asociadas”, indican desde a entidade.
Programa de formación e emprego en Down Coruña
A inclusión laboral das persoas coa síndrome de Down e outras discapacidades intelectuais é un dos principais obxectivos de Down Coruña. A entidade busca, a través da inserción no mercado de traballo das súas persoas usuarias, que estas logren aumentar a súa independencia persoal e económica.
Down Coruña, do mesmo xeito que o resto de entidades Down de Galicia, propician a inclusión laboral en diferentes ámbitos e en distintos perfís, á vez que buscan que a sociedade normalice a inclusión laboral do colectivo en contornas ordinarias.
Sobre AFACO
A Asociación de Familiares de enfermos de Alzheimer e outras demencias afíns da Coruña (AFACO) é unha organización sen ánimo de lucro que está dirixida a mellorar a vida das persoas afectadas pola enfermidade de Alzheimer, así como a das súas familias, mediante unha atención integral personalizada e de calidade contrastada.
Os obxectivos permanentes que persegue AFACO son, entre outros, prestar asistencia psicolóxica e social aos familiares das persoas con Alzheimer; asesorar aos familiares sobre cuestións legais, sociolóxicas e económicas; facilitar, mellorar e controlar a atención dos pacientes con demencia para mellorar a súa calidade de vida ao máximo e estimular os estudos sobre a incidencia e evolución terapéutica.
