13 Maio, 2022

» Down Lugo imparte un obradoiro de cómic inclusivo

 

A Biblioteca Pública de Lugo acolleu o pasado mércores 4 de maio o obradoiro “Crea o teu propio cómic”, impartido pola técnica da área de educación de Down Lugo, Iria Pérez.

Co obxectivo de promocionar a lectura e a creatividade literaria, e seguindo a guía “Crea o teu propio cómic” elaborada por Down España, 9 nenos e nenas puideron coñecer, entre outras cousas, que é un cómic, cales son ás súas partes fundamentais, como crear un escenario ou como facer as súas personaxes.

Despois dunha choiva de ideas na que decidiron crear unha historia na época prehistórica, foron elaborando o guión, as personaxes e distribuíndo as viñetas. Cada participante ocupouse de elaborar unha das viñetas, creando de forma colaborativa un cómic moi divertido cun final inesperado.

Foi unha tarde moi enxeñosa na que os e as debuxantes demostraron que todas as persoas podemos ser creativas se temos as oportunidades para facelo.

 

 

Guía “Crea o teu propio cómic” de Down España

O pasado mes de marzo, Down España, co apoio do Ministerio de Cultura e Deporte e grazas á colaboración do debuxante de cómics Xcar Malavida, lanzou a guía en lectura fácil e os talleres “Crea o teu Propio Cómic” co obxectivo de impulsar e dar visibilidade ás competencias creativas e comunicativas das persoas coa síndrome de Down e outras discapacidades intelectuais.

Accede á guía “Crea o teu propio cómic” facendo clic aquí.