Down Coruña, a través da súa iniciativa ‘O Quiosco de Down Experience’, participou o pasado domingo 29 de maio na ‘EA! Gastrosocial Experience’, o I Congreso de Gastronomía social desde a agricultura, a cociña e a hostalería celebrado en Ronda (Málaga).

A entidade foi convidada á cita para explicar o caso de éxito de Down Experience en materia de inclusión laboral de persoas coa síndrome de Down e outras discapacidades intelectuais no sector da hostalería.

Manuel Rego, director executivo da entidade, e Manuel Álvarez Esmorís, vicepresidente da mesma, participaron na mesa de traballo “Transcendendo os límites das limitacións”, compartindo espazo con membros da asociación Cociñar a Cegas de Logroño.

“Había unha gran expectación pola nosa iniciativa e tivo unha gran acollida”, conta Manuel Álvarez Esmorís. “Outras entidades da zona mostraron gran interese pola experiencia de ‘O Quiosco de Down Experience’ e falaron de exporse facer algo parecido nun futuro para as persoas con discapacidade en Andalucía”, relata o vicepresidente de Down Coruña.

‘EA! Gastrosocial Experience’ traballa pola igualdade de oportunidades de todas as persoas, sendo a sustentabilidade e a integración social os eixos sobre os que pivota esta cita. “O proxecto Esencia Andalucía Gastrosocial Experience nace para poñer en valor a cociña e a gastronomía desde o mundo rural e a súa achega e relevancia para afrontar as problemáticas e os retos da sociedade actual”, explican desde a organización.

Almorzo de traballo con Alía Network

Ademais da participación no ‘EA! Gastrosocial Experience’, representantes de ‘O Quiosco de Down Experience’ compartiron co equipo de Alía Network un almorzo de traballo para explicar o nacemento e progresión deste proxecto de inclusión laboral dentro da hostalería. A cita celebrouse o pasado 25 de maio e estivo presidida por Carlos Martín Pacheco, presidente da Asociación Alía Network. Por parte de Down Experience acudiu Manuel Rego, director executivo do proxecto e de Down Coruña.

Tal e como explicou Manuel Rego durante o almorzo, “o Quiosco de Down Experience e o seu bocadillo de luras son un referente da cidade da Coruña”. E isto foi posible “grazas a un produto de calidade cun prezo razoable que á xente lle gusta”. A aceptación da proposta hostaleira foi grande entre a cidadanía coruñesa e representa un modelo de éxito rotundo de inclusión laboral.