Dez mozos e mozas da Fundación Down Compostela e a Asociación Down Vigo participaron o pasado venres no IX Campionato de Baristas Down de Galicia, organizado por ambas as entidades e pola empresa Cafento e celebrado no Hotel Ruta Jacobea de Santiago de Compostela.

Tras o parón en 2021 debido á pandemia de COVID-19, este ano retomábase por fin a presencialidade deste evento con toda a ilusión e con moitas ganas de demostrar que a inclusión laboral das persoas coa síndrome de Down e outras discapacidades intelectuais é máis que posible no sector da hostalería.

Por parte da Fundación Down Compostela, Mariña, David, Iván, Sara e Cristina integraron o equipo “Drupa”, mentres que en “Os Cremosos” de Down Vigo participaron Andrea, Fran, Gisela, Mª Carmen e Víctor. Ante un público formado por varias decenas de persoas, os mozos e as mozas prepararon dous espressos, dous capuchinos e un combinado frío.

Tras a execución da proba, o equipo “Drupa” conseguiu os premios ao mellor espresso e ao mellor capuchino, mentres que o equipo “Os Cremosos” logrou vencer na categoría de mellor combinado frío sen alcol con base de café.

Pero para chegar a este campionato nas mellores condicións de preparación, as persoas integrantes dos dous equipos recibiron varias horas de formación durante a semana do evento. Diego López, embaixador barista de Cafento, foi o formador do equipo de Down Compostela nas instalacións da marca no polígono do Tambre, mentres que Alba Rodríguez, barista de Montecelio, foi a encargada de formar ás persoas participantes de Down Vigo na sede da asociación viguesa.

Sobre os Campionatos Baristas Down

Os Campionatos Baristas Down son unha iniciativa pioneira no mundo da empresa cafeteira Cafento, que consiste en levar as competicións entre profesionais expertos na cultura do café de calidade ás persoas coa síndrome de Down.

O primeiro Campionato Barista Down desenvolveuse en Galicia no ano 2012, co obxectivo de visibilizar o traballo das persoas coa síndrome de Down e as súas posibilidades de integrarse no mercado laboral como baristas. A partir deste intre, celebráronse ao longo da xeografía española diversos Campionatos Baristas Down, entre os que destacan os de Asturias, Andalucía, Comunidade Valenciana e Rexión de Murcia.

Grazas a estes certames, máis dun centenar de persoas coa síndrome de Down e outras discapacidades intelectuais de toda España puideron formarse como especialistas no mundo do café. Delas, case unha trintena tivo ocasión de realizar prácticas laborais en diversos tipos de establecementos de hostalería.

Pero máis aló de pretender contribuír á inserción laboral, e consecuente autonomía das persoas coa síndrome de Down e outras discapacidades intelectuais, os Campionatos Baristas Down queren ser unha oportunidade para visibilizar a este colectivo como persoas perfectamente capaces.