A Fundación Down Compostela e a asociación Down Ourense participaron durante o pasado mes de maio en senllas actividades de sensibilización dirixidas ao alumnado de dous centros de formación profesional da súa área de influencia.

Así, a comezos de mes, Paula Fernández, usuaria do servizo de Emprego con Apoio da Fundación Down Compostela, compartiu co alumnado do Ciclo Superior de Integración Social do CIFP Compostela a súa experiencia no relativo á inclusión sociolaboral. Acompañada por Aloia Lema e Beatriz Martínez, profesionais da Fundación, explicaron os programas existentes na Área de Formación e Emprego da entidade e a metodoloxía de traballo a través da vivencia persoal de Paula.

Pola súa parte, Verónica Pardellas e Silvia Álvarez, usuaria e responsable do programa de emprego da asociación Down Ourense respectivamente, acudiron ao CIFP Portovello a presentar ao alumnado do Ciclo Superior de Integración Social as vantaxes da metodoloxía de Emprego con Apoio e a experiencia de Verónica en empresas da contorna.

20 anos coa metodoloxía Emprego con Apoio

Foi no ano 2002 cando as entidades Down en Galicia comezaron a desenvolver o programa Emprego con Apoio, deseñado para atender especificamente as necesidades e barreiras que as persoas coa síndrome de Down e outras discapacidades intelectuais atopan á hora de intentar acceder ao mercado laboral ordinario.

Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un novo emprego contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que a persoa empregada poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros e compañeiras de traballo e na mediación na relación con eles para que se desenvolva de maneira positiva e natural.

Trátase, en definitiva, de prestar ás persoas con discapacidade intelectual os medios, os recursos e os apoios necesarios que faciliten a súa participación no mercado laboral da súa comunidade da mesma maneira que o resto de cidadáns e cidadás, favorecendo, deste xeito, a súa incorporación ou a súa estabilidade laboral e, de forma máis extensa, a súa inclusión social.

Avalada polos seus bos resultados, esta metodoloxía estase a consolidar como unha estupenda fórmula de inserción laboral para aqueles colectivos con máis dificultades á hora de atopar un traballo e supón unha alternativa idónea ás fórmulas de emprego protexido, baseadas nunha filosofía claramente asistencial e concibidas cun carácter instrumental e non como perpetradora do cambio nin como solución final ao problema.