O pasado mes de maio, Belén, Iria e Isma, tres profesionais da área de Educación de Down Lugo, desprazáronse ao CEIP Castro de Ouro de Alfoz para presentar e implementar un exemplo de escola inclusiva.
Durante o desenvolvemento da xornada empregaron o Deseño Universal da Aprendizaxe (DUA), un modelo de ensinanza que supón un cambio total de paradigma educativo, permitindo a todas as persoas estar, participar e progresar en contextos educativos ordinarios e acollendo e respectando a diversidade presente nas aulas. O DUA traslada o foco da discapacidade dende a persoa cara os contextos e materiais, establecendo unha ruptura total coa dicotomía entre as persoas con e sen discapacidade e aplicando o concepto de diversidade a todo o alumnado, sen excepción.
Os técnicos da entidade Down impartiron unha clase de lingua castelá na que participaron doce nenos e nenas de 4º, 5º e 6º de Educación Primaria e na que se traballou o verbo. O reto era maiúsculo, xa que, ao tratarse dun centro educativo pequeno, conviven na mesma aula nenos e nenas de diferentes etapas educativas.
A sesión estivo estruturada en tres actividades multiniveladas. Así, os nenos e nenas formaron tres grupos que foron rotando por cada unha das actividades, levadas a cabo a través dunha ruleta de verbos, xogos de representación e música. Con estas actividades traballáronse os obxectivos previamente consensuados co titor do centro educativo, e os alumnos e alumnas foron quen de recoñecer verbos, estruturar oracións e identificar tempos verbais.
A experiencia foi moi positiva, garantindo a presencia, participación e progreso de cada un dos nenos e nenas presentes na aula.
Desde Down Galicia e Down Lugo queremos dar as grazas ao CEIP Castro de Ouro polo seu interese e animamos aos demais centros educativos a que sigan apostando por unha educación inclusiva.
