Hai tres semanas que Manu Otero, un mozo con discapacidade intelectual membro da Fundación Down Compostela, se converteu en traballador indefinido da empresa de transporte SEUR.
Tras un breve período de prácticas no que o mozo demostrou todo o seu potencial, a empresa decidiu apostar por el inmediatamente ofrecéndolle un sitio fixo nas instalacións que a compañía ten no Polígono da Sionlla de Santiago de Compostela.
Durante a súa xornada de dúas horas diarias de luns a venres, desempeña diversas tarefas como organizar os contedores e manter a zona de carga e descarga organizada e recollida, escanar os códigos dos sobres e paquetes pequenos e colocalos no seu lugar correspondente ou recoller o cartón sobrante e levalo á máquina encartadora. Unha vez que remata as súas tarefas principais, Manu dedica o resto da súa xornada laboral a prestar apoio para manter a nave recollida, axudar na descarga do camión coa axuda dun traspalé e levar paquetes a sitios específicos da nave.
O mozo asegura que está “cen por cen” contento no seu novo traballo, do que destaca que o que máis lle gusta é “manexar o traspalé, pistolear, as tarefas de limpeza e revisar paquetes” e que, tralo período dun mes de prácticas, só precisa apoio para “manexar cargas moi pesadas”.
En canto á relación cos seus compañeiros e compañeiras, esta non podería ser mellor. Manu conectou desde o principio con todos e todas e asegura que se levan “moi ben”, xa que teñen bastantes cousas en común. Todo o mundo lle ofrece a posibilidade de probar as tarefas as veces que sexan necesarias para que as domine e a dinámica e o ambiente durante as horas de traballo que o mozo está na nave é estupendo.
Novas incorporacións en varias localidades de Galicia
Esta contratación, primeira de SEUR en Galicia dunha persoa pertencente a unha entidade Down, naceu tras unha reunión na que a Federación Down Galicia presentou á empresa o programa de Emprego con Apoio.
Grazas á boa experiencia en Santiago de Compostela, a compañía acaba de sumar ós seus equipos de traballo en Ourense e Vigo a tres persoas usuarias das entidades Down destas cidades para realizar prácticas con posibilidade de contratación, sendo a idea incorporar a máis persoas en outras localidades galegas.
Por iso, desde o Movemento Down de Galicia queremos agradecer as oportunidades e a predisposición de SEUR nestas insercións e a súa aposta polo emprego inclusivo.
