Tras un tempo de obrigada pausa pola crise sanitaria derivada da pandemia da COVID-19, varios mozos e mozas usuarias de Down Pontevedra “Xuntos” volveron participar nas actividades de voluntariado que acostumaban a realizar coa asociación de acollida e adopción de cans “Os Palleiros”.
Grazas a esta colaboración, que deu comezo no ano 2017, persoas vencelladas a Xuntos participan xunto con outras persoas voluntarias da protectora nos paseos cos animais que se organizan nas marismas de Alba e no río Gafos.
Pero esta é só unha das actividades realizadas dentro do seu voluntariado. En 2018 e 2019 leváronse a cabo senllas visitas ás instalacións da asociación, nas que os mozos e mozas da entidade Down colaboraron no lavado e alimentación dos cans.
Desta forma, ademais de apoiar o labor da protectora e desempeñar un rol activo na contorna da que forman parte, as persoas usuarias de Xuntos contan cun espazo de encontro e de ocio inclusivos.
