A mediados do pasado mes de xuño, máis de 30 persoas vencelladas á asociación Down Lugo percorreron o tramo do Camiño Primitivo que vai desde Lugo a San Romao da Retorta. Persoas usuarias e profesionais da entidade camiñaron xunto con persoas voluntarias de ASTELU, a Asociación Sénior de Telefónica de Lugo, coas que pasaron unha xornada do máis divertida.
O día comezou no centro de Lugo, de onde o grupo saíu ás 10 horas, e tras atravesar a cidade andado, chegaron ata a Ponte Romana. Alí esperábaos un autobús que os levou a Santa Eulalia de Bóveda, onde visitaron o seu templo romano.
Uns quilómetros máis tarde, en Bacurín, os e as camiñantes percorreron outro tramo a pé ata chegar á súa igrexa Románica. Unha vez rematada a visita ao santuario, o autobús volveu a recollelos para levalos a San Romao, onde contemplaron o seu Miliario e escoitaron as estupendas anécdotas dun dos seus habitantes.
Por último, unha vez rematada a peregrinación, o grupo achegouse ata Crecente para xantar e pasar unha sobremesa moi agradable acompañada de música e baile.
Esta actividade foi organizada ao abeiro do programa “O Teu Xacobeo” da Xunta de Galicia.