Delmiro Prieto González, presidente de Down Galicia, e Miguel Corgos López-Prado, conselleiro de Facenda e Administración Pública da Xunta de Galicia, asinaron esta mañá un convenio de colaboración entre as entidades que representan, mediante o que a Federación asesorará á Consellería durante os futuros procesos de adaptación aos postos de traballo daquelas persoas con discapacidade intelectual que se incorporen como persoal funcionario na administración galega.
En concreto, esta colaboración céntrase no desenvolvemento tanto de accións de formación e orientación socio laboral previas ao ingreso ou ao inicio da prestación de servizos na Administración da Comunidade Autónoma de Galicia das persoas traballadoras con discapacidade intelectual, como accións de apoio ao desenvolvemento no propio posto de traballo ao longo da súa carreira profesional.
O convenio dará cobertura a todo o apoio que se preste dende as entidades Down de Galicia a través da figura profesional do preparador ou preparadora laboral, en calquera posto de traballo competencia de función pública e que sexa desenvolvido por unha persoa con discapacidade intelectual.
Así, as actuacións a desenvolver serán as seguintes:
- Cursos de formación específicos previos ao ingreso ou ao inicio da prestación de servizos na Administración da Comunidade Autónoma de Galicia, que serán impartidos por persoal da Xunta de Galicia co apoio de persoal das entidades membro da Federación Down Galicia.
- Apoio no proceso de inserción e adaptación efectiva ao posto de traballo das persoas con discapacidade intelectual, así como da súa contorna laboral.
- Seguimento do desempeño da actividade laboral, incluíndo formación continua en competencias instrumentais, transversais e laborais para as persoas con discapacidade intelectual, de acordo cos resultados da detección de necesidades formativas.
- Realización de talleres prácticos de intercambios de experiencias dirixidos ao persoal que realiza funcións de referencia na contorna de traballo das persoas con discapacidade intelectual.
